Браќата Грим (германски: Die Brüder Grimm или Die Gebrüder Grimm) Јакоб Грим (4 јануари 1785 – 20 септември 1863) и Вилхелм Грим (24 февруари 1786 – 16 декември 1859) биле германски филолози, јазичари и собирачи на германското народно творештво. Тие се најпознати по своите збирки од сказни и бајки, наречени „Сказни на браќата Грим“. Браќата Грим се сметаат за основачи на германската филологија и на германистиката.
Браќата Јакоб и Вилхелм завршиле средно образование во гимназијата “Фридрих” во Касел, a подоцна студирале право на Универзитетот во Марбург. Таму биле инспирирани од нивниот професор Фридрих фон Савињи, кој им го разбудил интересот за минатото. Биле во своите рани дваесетти години кога започнале со лингвистичките и филолошките студии кои кулминирале со Законот на Грим и нивните собрани изданија на бајки и сказни. Иако нивните збирки бајки станале неизмерно популарни, тие всушност биле нус-производ од јазичаричките истражувања кои биле примарна цел на браќата.
