Џорџо Фонтана е современ италијански писател роден во провинцијата Варезе. Студирал филозофија на Универзитетот во Милано, каде што дипломирал со теза посветена на филозофијата на Хилари Патнам.
Својот книжевен дебит го направил во 2007 година со романот Buoni propositi per l’anno nuovo, по што следувале и други значајни дела како Novalis и La velocità del buio, есеј што се занимава со берлусконизмот и италијанскиот идентитет. Меѓу неговите најпознати книги се Per legge superiore и Morte di un uomo felice, кои се занимаваат со теми поврзани со правдата, моралот и општеството. Романот Morte di un uomo felice ја добил престижната Premio Campiello во 2014 година и бил преведен на повеќе јазици.
Фонтана е автор и на други прозни дела, како новелата Un solo paradiso и семејната сага Prima di noi. Покрај прозата, тој пишува и стрипови, меѓу кои и делото Lamiere, кое се занимава со животот во сиромашните населби на Најроби.
Денес живее и работи во Милано. Освен што пишува книги, работи како сценарист за познатиот италијански стрип Topolino, а предава креативно пишување во школите Scuola Holden и Scuola Belleville.
